/ Мэдээ мэдээлэл / АЛБА ХААГЧДЫНХАА ГЭР БҮЛИЙН ГИШҮҮДТЭЙ УУЛЗАЖ, СУРГАЛТ ЗОХИОН БАЙГУУЛАВ.

АЛБА ХААГЧДЫНХАА ГЭР БҮЛИЙН ГИШҮҮДТЭЙ УУЛЗАЖ, СУРГАЛТ ЗОХИОН БАЙГУУЛАВ.

          Тус хэлтсийн удирдлага “Гэр бүлийн хүчирхийлэлтэй тэмцэх тухай хууль” 2017.02.01-ны өдрөөс хэрэгжиж эхэлсэнтэй холбогдуулан эрүүгийн цагдаагийн  тасгийн алба хаагчдын гэр бүлийн гишүүдэд тодорхой ойлголт өгөх, алба хаагчдаас энэ төрлийн гэмт хэрэг, зөрчил үйлдэхээр урьдчилан сэргийлэх зорилгоор хэлтсийн дарга, цагдаагийн хурандаа Ш.Цогбаатар, Эрүүгийн цагдаагийн тасгийн дарга, цагдаагийн хошууч Ю.Мэндбаяр нар эрүүгийн төлөөлөгч нарын гэргий, гэр бүлийн гишүүдийг 2017 оны 02 дугаар сарын 07-ны өдөр хүлээн авч уулзаж, шинээр батлагдсан Монгол улсын Гэр бүлийн хүчирхийллийн эсрэг тухай хуулийн талаар сургалт зохион байгууллаа.

         Уулзалт өдөрлөгийн үеэр Нийтийн хэв журам хамгаалах тасгийн гэр бүлийн хүчирхийлэл, хүүхдийн эсрэг гэмт хэргээс урьдчилан сэргийлэх ажил хариуцсан ахлах байцаагч, цагдаагийн ахмад Д.Будзаан гэр бүлийн хүчирхийлэл гэж юу болох, хуульд өөрчлөлт оруулах үндэслэл шалтгаан нөхцөл, хүчирхийллийн улмаас бэртэж гэмтэж, амь насаа алдаж байгаа иргэдийн талаарх тоо баримт, гадаад орнуудад гэр бүлийн хүчирхийллийн эсрэг хэрхэн тэмцдэг туршлагыг тайлбарлан таниуллаа.

      Мөн Хүчирхийллийн эсрэг Үндэсний төвийн “Эрх зүйн шинэчлэл” хөтөлбөрийн зохицуулагч Г.Ариунтуяаг бусад сэтгэл зүйчдийн хамтаар урин оролцуулж Гэр бүлийн хүчирхийлэлтэй тэмцэх тухай хуульд орсон өөрчлөлт, хүлээлгэх хариуцлага, хүчирхийлэлтэй тэмцэхэд хүрэх үр дүнгийн талаар болон гэр бүлдээ хүчирхийлэлгүй хэрхэн амьдрах, сэтгэл санааны тогтворгүй байдал,  уур бухимдалаа хэрхэн дарах зэрэг сэтгэл зүйн зөвлөгөө өгч, дасгалаар хийн харуулж, “Жендэрт суурилсан хүчирхийллийн эсрэг мэдээллийн хуудас”, гэр бүлийн дотны зөвлөх утсыг сурталчилсан гарын авлага тараан хүргэсэн нь тэдний талархалыг хүлээсэн сайхан ажил боллоо.

           Уулзалт өдөрлөгт ирсэн гэр бүлийн гишүүдэд хандаж хэлтсийн дарга, цагдаагийн хурандаа Ш.Цогбаатар:”...эрүүгийн алба бол Цагдаагийн байгууллагын хамгийн тэргүүн эгнээнд байж чаддаг, хамгийн бахархалтай, хүнд хэцүү ажил юм. Би Цагдаагийн байгууллагад тасралтгүй олон жил ажиллахдаа эрүүгийн албанд ажилласаар ирсэн, эрүүгийн цагдаагийн ажил өдөр шөнөгүй, хэзээ л бол хэзээ бэлэн байж чаддаг, хамгийн эхэнд дуудагддаг ажил байдаг юм, та бүхэн манай төлөөлөгч залуучуудын ар гэр нь болж, амьдрал ахуйгаа зохицуулж, үр хүүхдээ эрүүл саруул өсгөж байгаа Монголын сайхан эмэгтэйчүүдийн нэг билээ. Иймд цагдаагийн ажлыг хүндлэн бахархаж, бидний урилгыг хүлээн авч хүрлцэн ирсэн та бүхэндээ маш их баярлалаа...” хэмээн ярьж, тэдний сонирхсон асуултад хариулж, нээлттэй сайхан яриа өрнүүллээ.

          Тус хэлтсийн даргын дэргэдэх Зөвлөл нь энэхүү уулзалт өдөрлөгийг  бусад тасгийн алба хаагчдын дунд үргэлжлүүлэн зохион байгуулах бөгөөд алба хаагчдынхаа хууль эрх зүйн мэдлэгийг дээшлүүлэх, тэдний гэр бүлийн гишүүд, ар гэрийн нөхцөл байдалтай танилцах, дэмжин туслах ажлыг тасралтгүй зохион байгуулах юм.

            Уулзалт өдөрлөгийг Монголын Үндэсний Олон нийтийн Телевизийн уран бүтээлчид сурвалжлан мэдээллийн хөтөлбөртөө оруулж 2017 оны 02 дугаар сарын 08-ны өдрийн 18.00, 19.00 цагуудад нэвтрүүлэн иргэдэд хүргэхээр болсон байна.

СЭТГЭГДЭЛҮҮД :

Сэтгэгдэл үлдээгээгүй байна

Энд дарж зурган кодыг шинэчилнэ үү
Статистик мэдээ
  • 2015-02-07
Эрэн сурвалжилж байна